Турк, АНУ-ын Ерөнхийлөгч нар Сирид аюулгүйн бүс байгуулах асуудлыг утсаар хэлэлцжээ

Дэлхийд | Улс төр
Jargal.d@montsame.mn
2019-10-07 07:28:24

АНКАРА. /TASS/. Турк болон АНУ-ын Ерөнхийлөгч нар ням гарагт утсаар ярилцсан тухай Туркийн төрийн тэргүүний тамгын газар мэдээлжээ.


“Хоёр орны удирдагчид утсаар ярилцах үеэрээ хоёр талын харилцаанаас гадна, Сирид Евфрат мөрнөөс зүүн зүгт аюулгүйн бүс байгуулахтай холбоотой асуудлаар санал бодлоо солилцлоо” гэж мэдэгдэлд онцлон тэмдэглэжээ. Туркийн Ерөнхийлөгч мөн Америкийн цэргийн албан тушаалтнуудын үйлдлийн улмаас талууд аюулгүй бүс байгуулах тухай тохиролцоог хэрэгжүүлж чадаагүйд санаа зовниж буйгаа илэрхийлсэн байна.


“Курдын ажилтны нам болон Өөрийгөө хамгаалах ардын хүчний зүгээс учирч буй террорист аюулыг устгах”, мөн Сирийн дүрвэгсдэд нутаг буцах нөхцөлийг бүрдүүлэхийн тулд аюулгүйн бүс байгуулах зайлшгүй шаардлагатай гэж Эрдоган цохон тэмдэглэжээ.


Туркийн Ерөнхийлөгч утсаар ярих үеэрээ Анкара “Лалын улс” бүлэглэлтэй үргэлжлүүлэн тэмцэхийн зэрэгцээ бүс нутагт иймэрхүү асуудал дахин давтагдахаас зайлсхийхийн тулд шаардлагатай бүхий л арга хэмжээг авахад бэлэн гэдгийг Америкийн удирдагчид батлан мэдэгдсэн байна.


Үүнээс гадна, тэд 11 дүгээр сард уулзахаар тохиролцсон байна. “Хоёр орны удирдагчид АНУ-ын Ерөнхийлөгч Дональд Трампын урилгаар ирэх сард Вашингтонд хэлэлцээ хийхээр тохиролцсон” гэж Туркийн Ерөнхийлөгчийн тамгын газрын мэдэгдэлд дурджээ.


Холбоотой мэдээ