Хүүхдүүд илтгэх урлагаар дамжуулан ирээдүйгээ тодорхойлж байна

Орон нутагт | Сэлэнгэ
otgontsetseg@montsame.mn
2019-11-22 10:11:42

Сэлэнгэ /МОНЦАМЭ/Ирээдүйн хөгжил дэвшлийг гардан бүтээх иргэд болсон хүүхдүүд илтгэх урлагаар дамжуулан ирээдүйгээ тодорхойлж байна.

Сэлэнгэ аймгийн Мандал сумын Ерөнхий боловсролын сургуулиудын ахлах ангийн сурагчдын дунд "Залуус бид Монголын бахархал" сэдэвт илтгэлийн уралдааныг зохион байгуулсан байна. Илтгэгчид цахим орчинг зөв зохистой ашиглах, ирээдүйд итгэлтэй, эрдэм мэдлэгтэй эрүүл иргэн байх, цаашлаад эх орондоо хэрэгтэй хүн болох зэрэг асуудлыг илүү хөнджээ. Хүүхдүүд илүү бодитоор сэтгэж, ирээдүйгээ илүү гэгээлгээр төсөөлөн, хийсвэрлэн буулгаж буй нь ямар их сэтгэлийн тэмүүлэлтэй байгааг харуулж байгаа аж.

Уралдаанд нийт 21 сурагч оролцсоноос тэргүүн байрт Зүүнхараа Ерөнхий боловсролын 1-р сургуулийн 12а ангийн сурагч Т.Тодгэрэл шалгарч, 4-р сургуулийн 11б ангийн сурагч Д.Өлзийдүүрэн, 2-р сургуулийн 10а ангийн сурагч С.Сувд-Эрдэнэ нар удаалж, 3-р сургуулийн 11б ангийн сурагч М.Мөнхсүрэн тусгай байрт шалгарчээ.

Сэлэнгэ аймгийн Мандал сумын Хүүхэд залуучуудын ордноос жил бүр уламжлал болгон зохион байгуулдаг энэхүү илтгэлийн уралдаан нь "Монгол бахархал"-ын өдөрт зориулан болдгоороо онцлогтой аж. Оролцогч хүүхдүүд нэг ижил сэдвийн хүрээнд өөрсдийн үзэл бодол ур чадвар, эрдэм мэдлэгээ уралдуулан өрсөлддөг.

Уралдааныг зохион байгуулагчдын зүгээс сурагчдыг жил ирэх тусам чадваржиж байна. Тэдний хэлсэн санаанаас бодож, тунгаах зүйл их байлаа хэмээв. Түүнчлэн уралдаанд оролцсон бүх хүүхдэд гарын бэлэг гардуулсан нь тэдэнд урам өгсөн үйл явдал болжээ. 

Холбоотой мэдээ