БНЧУ-аас тэтгэвэр тогтоолгох боломжтой болно

Монголын мэдээ | Улс төр
munkhbaatar@montsame.gov.mn
2020-04-07 17:08:48
@s_munkhbaatar

Улаанбаатар /МОНЦАМЭ/. УИХ-ын гишүүн, ХНХ-ын сайд С.Чинзориг “Нийгмийн хамгааллын салбарт хамтран ажиллах тухай Монгол Улс, Бүгд Найрамдах Чех Улс /БНЧУ/ хоорондын хэлэлцээр”-ийг соёрхон батлах тухай хуулийн төслийг УИХ-ын дарга Г.Занданшатарт өнөөдөр өргөн барилаа.


Ноднингийн судалгаагаар, БНЧУ-д 8813 монгол иргэн ажиллаж, сурч байна. Тус улсын Дотоод хэргийн яамны мэдээллээр, нийт оршин сууж буй монгол иргэдийн 65 орчим хувь нь 5-25 жил амьдарч, оршин суух эрхээ авчээ.


Монгол Улсын иргэн тус улсад оршин суух хугацаандаа богино хугацааны нийгмийн даатгалд хамрагдаж, хөдөлмөр эрхлэхтэй холбоотой тэтгэмж, эрүүл мэндийн эмчилгээ, үйлчилгээг авах эрхтэй байдаг. Харин урт хугацааны даатгал буюу тэтгэврийн даатгалд хамрагдаж, нутаг буцах үедээ төлсөн шимтгэлээ буцаан авах, эсхүл тэтгэврийн насанд хүрсэн үедээ төлсөн шимтгэлдээ ногдох тэтгэвэр тогтоолгох, БНЧУ-д ажилласан хугацаагаа даатгуулсан хугацаанд тооцуулах зэрэг эрх зүйн зохицуулалт байдаггүй.


Иймд уг хэлэлцээрийг соёрхон баталснаар, иргэдийн нийгмийн баталгаа сайжирч, тус улсад ажилласан хугацааг нэгтгэн тооцож, Монгол Улс болон БНЧУ-аас өндөр насны тэтгэврийг тогтоолгон авах боломж бүрдэх юм.

Холбоотой мэдээ