Цэнэгтэй 300 гаруй сум олджээ

Орон нутагт | Дорнод
167@montsame.mn
2020-05-29 18:03:12

Дорнод /МОНЦАМЭ/. Дорнод аймгийн Баянтүмэн сумын дөрөвдүгээр багийн нутагт байх Танкийн саад орчмоос 300 гаруй ширхэг цэнэгтэй сум олдлоо.

Тодруулбал, Зенитийн пулемёт ОПЗ сум, 37мм хошуу 85 ширхэг, сургалт дадлагын хонгио 8 ширхэг, задрах дэлбэрэх сум 56 ширхэг, хуяг нэвтлэгч шатаагч сум 72 ширхэг, Т-62 танкийн 115мм цоргих үйлчилгээтэй сум, задран дэлбэрэх сум 42 ширхэг олдсон гэж мэдээлэв.

Одоогоор Зэвсэгт Хүчний жанжин штабаас дэд хурандаа Д.Баасансүрэнгээр ахлуулсан 327 дугаар ангийн тэсрэх дэлбэрэх зүйлсийн хайгуул устгалын 11 хүний бүрэлдэхүүнтэй бүлэг тав дахь өдрөө үргэлжлүүлэн ажиллаж байна. Энэ хугацаанд дээрх сум галт хэрэгслийг аюулгүй болгож амжина гэж төлөвлөсөн ч хугацаа сунгаж ажиллах шаардлагатай болжээ.

Түүнчлэн аймгийн Засаг даргын захирамжаар ажлын хэсэг байгуулан аймгийн төв болон Баянтүмэн суманд ЗХУ-ын цэргийн анги нэгтгэлүүд байрлаж байсан суурин газрууд, хээрийн сургуулилт хийж байсан дөрвөн том талбайд сум, тэсрэх дэлбэрэх зүйлсийг эрэн хайх, устгах ажлыг явуулж байгаа юм.

Холбоотой мэдээ