Тусгай зөвшөөрөл цуцалсан талбайд хяналт, шалгалт хийж байна

Орон нутагт | Архангай
gereltod@montsame.mn
2020-07-10 13:36:04

Архангай /МОНЦАМЭ/. Аймгийн Засаг даргын 2020 оны 06 дугаар сарын 08-ны өдрийн А/369 дугаар захирамжаар хяналт, шалгалт хийх тухай захирамж, ажиллах хуваарийг баталсан.

Мэргэжлийн хяналтын газар, Байгаль орчин, аялал жуулчлалын газар, Орхон-Чулуут голын сав газрын захиргаа, Цагдаагийн газар, Онцгой байдлын газар мөн Цагдаагийн ерөнхий газрын Экологийн цагдаагийн алба гэсэн бүрэлдэхүүнтэйгээр 6 дугаар сарын 02-ноос 9 дүгээр сарын 4 хүртэл хуваарийн дагуу ажиллах юм.

Одоогоор Өлзийт Тээлийн аманд MV-001410 дугаартай тусгай зөвшөөрлийг эзэмшиж байсан “БМНС” ХХК нь байгаль орчныг хамгаалах, нөхөн сэргээх менежментийн 15 га-д техникийн, 13 га-д биологийн нөхөн сэргээлт хийх төлөвлөгөөг БОАЖЯ-аар батлуулан биологийн нөхөн сэргээлт хийх зорилгоор нутгийн иргэдээр хашаа бариулж байна.

Мөн Будантын амны “Улз гол” группын эзэмшиж байсан талбайд иргэд цугларч, гар аргаар алт олборлож байсан зөрчлийг таслан зогсоож, ухсан нүхийг бөглүүлж, нөхөн сэргээлтийг хийлгээд байна.

Сүүлийн өдрүүдэд усархаг бороо их орж үер буун тэр хавийн шороо ихээр урсаж байгааг хяналтын багийнхан хэлж байна. Байнгын хяналтын пост ажиллаж байгаа бөгөөд гар аргаар алт олборлодог иргэдийг тухай бүрт нь хөөн гаргаж байгаа ажээ.

Ашиглалтын MV-007207, MV-009258 дугаартай тусгай зөвшөөрлийг эзэмшиж байсан “Монгол газар” ХХК 14 га-д, “Эм Жи Эйч” ХХК 10 га-д, MV-017316 дугаартай тусгай зөвшөөрлийг эзэмшиж байсан “Сэншивэе Монгол” ХХК-ийн ашиглаж байсан эвдэрсэн талбайд БОАЖЯ-ны тусгай дансанд байршуулсан Байгаль орчныг хамгаалах нөхөн сэргээх барьцаа хөрөнгө болох 319,3 сая төгрөгөөр нөхөн сэргээлтийг хийх юм. Ажлыг эхлүүлэхээр төрийн болон орон нутгийн өмчийн хөрөнгөөр бараа ажил үйлчилгээ худалдан авах тухай хуулийн хүрээнд тендер зарлаад байгаа аж.

Холбоотой мэдээ