М.Уранцэцэг, Л.Сосорбарам, Ё.Басхүү нар аваргын төлөө барилдана

Монголын мэдээ | Спорт
dusem11@yahoo.com
2021-03-05 18:36:24

Улаанбаатар /МОНЦАМЭ/. Узбекистаны Ташкент хотноо Олон улсын жүдо бөхийн холбоо /IJF/-ны энэ оны 2 дахь цуврал тэмцээн болох “Tashkent Grand Slam 2021” Их дуулгын эхний өдөр барилдсан манай 9 бөхөөс 3 нь аваргын төлөө барилдахаар болов.  


Өнөөдөр эмэгтэйчүүдийн 48, 52, 57 кг, эрэгтэйчүүдийн 60, 66 кг жингийн барилдаанууд явагдаж аварга болон мөнгө, хүрэл медалийн төлөөх барилдаан Улаанбаатарын цагаар 22.00 цагаас болно.


Дэлхийн аварга, гавьяат тамирчин М.Уранцэцэг 48 кг-д хэсгийн аваргын төлөө Италийн Франческа Миланиг, хагас шигшээд Сербийн Андре Стоядиновыг ялснаар мөнгөн медалийн болзол ханган аваргын төлөө барилдахаар болов.


Мөн ОУХМ Л.Сосорбарам эмэгтэйчүүдийн 52 кг-д хагас шигшээ барилдаанд Сербийн Надезда Петровичийг ялснаар аваргын алтан медалийн төлөө энэ үдэш Японы Юта Абэтэй барилдана.


Харин олимпын мөнгөн медальт, Хөдөлмөрийн баатар Д.Сумъяа 57 кг-д Сербийн Марика Перисичид ялагдан тэмцээнээ дуусгав.


Эрэгтэйчүүдийн 66 кг-д ОУХМ Ё.Басхүү хагас шигшээ барилдаанд ОХУ-ын Арам Григоряаныг ялснаар мөнгөн медалийн болзол ханган, аваргын төлөө БНСУ-ын жүдоч Ан Баултай энэ үдэш хүч үзэхээр болов.

Холбоотой мэдээ