“G7” хөгжиж буй орнуудын охидын боловсролд хөрөнгө оруулна

Дэлхийд | Боловсрол
Jargal.d@montsame.mn
2021-05-03 10:53:33

ЛОНДОН. /TASS/. “G7” буюу “Долоогийн бүлэг”-ийн орнууд хөгжиж буй орнуудын охид, эмэгтэйчүүдийн боловсролд зориулж ирэх хоёр жилийн хугацаанд 15 тэрбум ам.доллар гаргахаар төлөвлөж байгаа тухай Их Британийн Гадаад хэргийн яам /ГХЯ/ мэдээлжээ.  


“G7”-гийн гишүүн орнууд энэхүү хөрөнгө оруулалтын ачаар 2026 он гэхэд бага орлоготой орнуудын 40 сая гаруй охин сургуульд сурах боломжтой болж, эдгээр орны 20 сая охин 10 насандаа уншиж сурна гэж найдаж байна. “Охидын боловсролд хөрөнгө оруулах нь хүмүүсийг ядуурлаас гаргах, эдийн засгийн өсөлтийг нэмэгдүүлэх, хүний ​​амь насыг аврах, коронавирусний цар тахлын нөлөөг даван туулахад туслах хамгийн ирээдүйтэй хөрөнгө оруулалтын нэг юм. Ээж нь уншиж чаддаг хүүхдүүд таван нас хүрэхээсээ өмнө эндэх магадлал 50 хувиар буурч, сургуульд сурах магадлал хоёр дахин, бичиг үсэг үл мэдэгч эхчүүдийн хүүхдүүдтэй харьцуулахад вакцин хийлгэх магадлал 50 хувиар илүү байдаг" гэж Их Британийн ГХЯ-ны мэдэгдэлд дурджээ.


Хөрөнгө оруулалтыг “G7”-гийн орнуудын 2018 онд эхлүүлсэн хөгжлийн санхүүгийн байгууллагуудын түншлэл буюу “2X Challenge” механизмаар дамжуулан хуваарилахаар төлөвлөжээ. Энэхүү түншлэл нь олон улсын байгууллагууд болон олон улсын хөгжлийн банкуудын санхүүжилтээр эмэгтэйчүүдийн эзэмшдэг эсвэл эмэгтэйчүүд олноороо ажилладаг, үйл ажиллагаа нь ихэвчлэн эмэгтэйчүүд рүү чиглэсэн аж ахуйн нэгжүүдэд санхүүгийн туслалцаа үзүүлэх зорилгоор үйл ажиллагаагаа явуулдаг байна.


Коронавирусний цар тахлын улмаас охид, эмэгтэйчүүд “сургууль завсардаж, нөхөн үржихүйн эрүүл мэндийн үйлчилгээнд хамрагдах боломж нь хумигдаж, хүчирхийлэлд өртөх, ажилгүй болох эрсдэл нэмэгдсэн үед ийм төсөл хэрэгжүүлэх нь нэн чухал юм гэж Их Британийн ГХЯ цохон тэмдэглэжээ.


Их Британийн ГХЯ дээрх мэдэгдлийг Лондонд энэ сарын 3-5-ны хооронд зохион байгуулах "G7"-гийн Гадаад хэргийн сайд нарын уулзалтын өмнөхөн нийтэлсэн байна. Их Британи, Герман, Итали, Канад, АНУ, Франц, Японы Гадаад хэргийн сайд нараас гадна уулзалтад ЕХ-ны Гадаад харилцаа, аюулгүй байдлын бодлогын дээд төлөөлөгч Жозеп Боррель, Австрали, Энэтхэг, БНСУ, ӨАБНУ-ын төлөөлөгчид, мөн АСЕАН-ы Ерөнхий нарийн бичгийн дарга Лим Жок Хойг урьжээ.


Холбоотой мэдээ