Дэлхийн эдийн засаг энэ онд 5.6 хувиар өснө хэмээн таамаглажээ

Дэлхийд | Эдийн Засаг
khulan@montsame.gov.mn
2021-06-09 13:03:54

ВАШИНГТОН. /Reuters/. Дэлхийн банк дэлхийн эдийн засгийн энэ оны өсөлтийг 5.6 хувьд хүрнэ хэмээн урьдчилан таамаглаж буйгаа мягмар гарагт танилцууллаа. Энэ нь нэгдүгээр сарын таамаглалаас 1.5 хувиар өссөн үзүүлэлт юм.


"Дэлхийн эдийн засаг "COVID-19" цар тахлын улмаас 2020 онд 3.5 хувиар агшсан тул дэлхий дахин сүүлийн 80 жилд байгаагүй өсөлтийг энэ онд үзэх төлөвтэй байна" гэж Дэлхийн эдийн засгийн хэтийн төлөвийн тайланд цохон тэмдэглэжээ.


Гэвч улс орнуудын эдийн засгийн өсөлт вакцинжуулалтын улмаас 2021 онд өөр хоорондоо эрс ялгаатай байх төлөвтэй байна. Тодруулбал, АНУ тэргүүтэй чинээлэг орнууд манлайлах хандлагатай байгаа бол хөгжиж буй, бага орлоготой орнуудын хувьд “COVID-19” цар тахал болон түүний нөлөөнд үргэлжлэн нэрвэгдэж магадгүй ажээ.


Дэлхийн хамгийн том эдийн засагтай орнуудын өсөлтийг авч үзвэл, АНУ-ын эдийн засаг энэ онд 6.8 хувиар, БНХАУ-ын эдийн засаг 8.5 хувиар өсөх төлөвтэй байна. Түүнчлэн хөгжиж буй орнуудын хувьд энэ үзүүлэлт 4.4 хувь, бага орлоготой орнуудынх 2.9 хувьтай байна хэмээн Дэлхийн банкны мэргэжилтнүүд урьдчилан таамаглажээ.

Холбоотой мэдээ